ABŞ Senatının Xarici Əlaqələr Komitəsi “MEGOBARI Aktı” adlı qanun layihəsini təsdiqləyib.
Bu qanun “Gürcüstanın Hesabatlılıq, Davamlılıq və Müstəqillik üçün Seçimlərinin Hərəkətə Gətirilməsi və Genişləndirilməsi Aktı” adlanır və Gürcüstan xalqına, eləcə də ölkənin Avroatlantik inteqrasiyasına ABŞ-ın dəstəyini ifadə edir.
Sənəddə Gürcüstan hökumətindəki korrupsiyaya bulaşmış rəsmilərə, xüsusilə də Gürcü Arzusu Partiyasının nümayəndələrinə qarşı sanksiyaların tətbiqi nəzərdə tutulur. Qanun layihəsinin əsas məqamları bunlardır:
ABŞ-Gürcüstan münasibətlərinin və bütün yardım proqramlarının yenidən nəzərdən keçirilməsi;
Gürcüstanın suverenliyi və ərazi bütövlüyünə dəstəyin gücləndirilməsi;
Vətəndaş cəmiyyətinə və demokratiyaya təzyiqlərə baxmayaraq dəstəyin davam etdirilməsi;
Gürcü Arzusu rəsmilərinə və onların tərəfdarlarına qarşı sanksiyaların tətbiqi.
MEGOBARI Aktı ilk dəfə 2024-cü ilin mayında konqresmen Co Uilson tərəfindən ABŞ Nümayəndələr Palatasına təqdim olunub. Əvvəlki sessiyada irəliləyiş əldə olunmasa da, bu ilin yanvarında yenidən gündəmə gətirilib və hazırda Senatda müzakirə və səsvermə üçün növbəti mərhələyə keçib.
