Foto: “Jamnews”
Ermənistanın Baş naziri Nikol Paşinyan bildirib ki, ölkə Qarabağ münaqişəsinin formalaşdırdığı siyasi məntiqdən imtina etməli və sülhə əsaslanan yeni inkişaf modelinə – «Dördüncü respublika»ya keçməlidir.
Paşinyan avqustun 20-də – parlamentdə hökumətin beşillik proqramını təqdim edərkən deyib ki, onun rəhbərlik etdiyi «Vətəndaş müqaviləsi» partiyasının iyunun 7-də keçirilmiş parlament seçkilərində qələbəsindən sonra «Real Ermənistan» ideologiyası ölkənin rəsmi siyasi istiqamətinə çevrilib.
«Üçüncü respublika münaqişə məntiqi əsasında yaradılmışdı, dördüncü respublika isə sülh məntiqi əsasında formalaşacaq» deyə, o əlavə edib.
Paşinyanın sözlərinə görə, üçüncü respublikanın siyasi sistemi «tarixi ədalət» ideyası üzərində qurulmuşdu və bunun əsas təzahürlərindən biri Qarabağ hərəkatı idi.
O, həmçinin xatırladıb ki, 2021-ci ildə onun partiyasının seçki proqramında 2020-ci il müharibəsindən sonra Azərbaycanın nəzarətinə keçən Şuşa və Hadrutun «işğaldan azad edilməsi» müddəaları yer almışdı.
«Həmin seçkilər zamanı başa düşdüm ki, əsas vəzifə sülh gündəliyini önə çəkmək olmalıdır» deyə, Paşinyan bildirib.
Hazırda o, Azərbaycan və Türkiyə ilə münasibətlərin normallaşdırılmasını Ermənistanın təhlükəsizliyinin və iqtisadi inkişafının şərti kimi önə çəkir.
Bununla yanaşı, hökumətin yeni beşillik proqramında demokratik, korrupsiyaya qarşı mübarizə və iqtisadi islahatların davam etdirilməsi nəzərdə tutulur.
Beləliklə, hakimiyyət «Real Ermənistan» konsepsiyasını yalnız siyasi şüar kimi təbliğ etmir; mərkəzində Qarabağ münaqişəsinin yox, sülhün, suverenliyin, iqtisadi inkişafın və daxili islahatların dayandığı yeni dövlət modeli kimi təqdim edir.
“Politfm”
