Foto: “Reuters”/Valentin Oqirenko
Hazırda cəbhə xəttində ötən ilin ortalarından bəri ən yaxşı vəziyyət yaranıb, mart ayında Ukrayna Silahlı Qüvvələri Rusiyanın hücumunun qarşısını alıb.
Ukrayna Prezidenti Volodimir Zelenski bu gün, aprelin 3-də Prezident Ofisinin yaydığı açıqlamasında belə deyib.
Müharibə artıq beşinci ildir davam edir, döyüşlər 1200 km-dən artıq cəbhə xətti boyunca gedir. Rusiya qüvvələri Ukraynanın müdafiəsini tükəndirməyə çalışır, amma Kiyev əks-hücum əməliyyatlarına ara vermir.
Zelenski bildirib ki, həm işğal, həm də azad edilmiş ərazilər nəzərə alınmaqda, Kiyev “müəyyən mənada üstün mövqedədir” və təxminən 20 kvadrat kilometr ərazini azad edib. O bu nailiyyətlərin hansı dövrə aid olduğunu konkretləşdirməyib.
“Silahlı qüvvələrimizin fəaliyyəti nəticəsində onların mart ayı üçün hücum planı pozuldu. Buna görə də indi ruslar sadəcə hücum əməliyyatlarını aktivləşdirirlər. Hazırda biz genişmiqyaslı təhlükə görmürük” deyə, Zelenski əlavə edib.
Rusiya Ukrayna ərazisinin 20%-dən bir qədər az hissəsinə nəzarət edir — bu ərzinin böyük hissəsi 2022-ci ildəki genişmiqyaslı hücumdan əvvəl ələ keçirilmişdi. Açıq mənbəli “Dərin Dövlət” kəşfiyyat xəritəsinə əsasən, yanvarın əvvəlindən bəri Rusiya cəmi təxminən 500 kvadrat kilometr irəliləyib. Bu, ötən illə müqayisədə tempin zəiflədiyini göstərir (“Reuters”).
“Ümumilikdə, cəbhə xətti qorunub saxlanır… Vəziyyət mürəkkəbdir, amma son 10 ayda olan ən yaxşı vəziyyətdir” – Zelenski Ukrayna və Britaniyanın kəşfiyyat məlumatlarına istinadən belə deyib.
Onun sözlərinə görə, Rusiya qüvvələri Donetsk vilayətində logistika qovşağı olan Pokrovsk yaxınlığında, həmçinin cənub-şərqi Zaporojye vilayətində yerləşən Qulyaypole ətrafında cəmləşib.
Ukrayna Baş Qərargahı son 24 saat ərzində 230 döyüş toqquşması qeydə alındığını bildirib və hücumların əksəriyyətinin Pokrovsk və Zaporojye istiqamətlərində olduğunu qeyd edib. Qərargahın məlumatına görə, hava istiləşdikcə, adətən, döyüşlər intensivləşir.
Diplomatik həll yolları hələlik nəticə verməyib.
Zelenski ABŞ-nin danışıqlar qrupunu Kiyevə dəvət etdiyini bildirb.
Rusiya dəfələrlə bəyan edib ki, onun ordusu Ukraynanın şərqindəki Donetsk vilayətində irəliləməyə davam edir və bu ərazini tam ələ keçirmək Moskvanın əsas məqsədlərindən biridir.
Moskva Kiyevdən tələb edir ki, qoşunlarını Donetsk vilayətində hələ də onun nəzarətində olan ərazilərdən çıxarsın. Zelenski bu tələbi rədd edir və davamlı sülh sazişinin əldə olunmasına, həmçinin Ukraynaya etibarlı təhlükəsizlik təminatlarının verilməsinə çalışır.
Yaxın Şərqdə müharibənin davam etməsi Ukraynaya silah tədarükünün gələcəyilə bağlı qeyri-müəyyənliyi artırır. ABŞ-nin vasitəçiliyilə aparılan sülh danışıqlarının faktiki olaraq dayanmış olduğu günlərdə Zelenski ABŞ nümayəndələrinə Kiyevə, daha sonra da Moskvaya səfər etməyi təklif edib.
“Hazırkı şəraitdə — İranla müharibə fonunda nümayəndə heyəti Kiyevə gəlmək üçün mümkün olan hər şeyi edəcək. Bu, texniki qruplar səviyyəsində üçtərəfli görüşün alternativ formatıdır” deyə, Zelenski bildirib.
“Politfm”
