Tayvanın hakim Demokratik Tərəqqipərvər Partiyası (DPP) parlamentdə 25 milyard dollarlıq xüsusi müdafiə büdcəsinin dəstəklənməsini tələb edir, Taypey, 8 may 2026 (foto: Ann Wang/”Reuters”)
Tayvanda müxalifətin nəzarətində olan parlament cümə günü müdafiə sahəsinə 25 milyard dollar məbləğində əlavə vəsaitin ayrılmasını təsdiqləyib (“Reuters”). Bu rəqəm, Çinin sürətlə müasirləşən ordusu qarşısında silahlı qüvvələri gücləndirmək üçün hökumətin tələb etdiyi məbləğin təxminən üçdə ikisini təşkil edir.
Tayvan Prezidenti Lay Çinq Te həm ABŞ-dan silah alınması, həm də Çinə qarşı çəkindirmə qabiliyyətini artırmaq üçün yerli istehsal olan avadanlıqların maliyyələşdirilməsi məqsədilə 1,25 trilyon Tayvan dolları (39,81 milyard ABŞ dolları) məbləğində əlavə müdafiə paketinin təsdiqlənməsini istəmişdi.
Lakin parlamentdə ən çox yerə sahib olan müxalifət, hökumətin təkliflərinin qeyri-şəffaf olduğunu və korrupsiyaya yol aça biləcəyini iddia edərək, xərclər paketinin öz versiyasını — 780 milyard Tayvan dolları (24,86 milyard ABŞ dolları) məbləğində olan variantı qəbul edib.
Hakim Partiyanın Reaksiyası
İqtidarda olan Demokratik Tərəqqi Partiyası (DPP) müxalifətin Müdafiə Nazirliyinin dəfələrlə verdiyi izahatlara məhəl qoymamasından təəssüf hissi keçirdiyini bildirib. Partiyanın fikrincə, bu addım nəinki Tayvanın müdafiə imkanlarını məhdudlaşdırır, həm də təhlükəsizlik boşluqları yarada bilər.
Partiya sözçüsü Li Kun-Çenq bəyanatında deyib:
”Bu, sadəcə dollar məbləğində endirim deyil — bu, Tayvanın hərtərəfli müdafiə sisteminə və Tayvanın özünü müdafiə etmək əzmini dünyaya bəyan etməsinə tətbiq edilən bir endirimdir.”
Müxalifətin Mövqeyi
Ən böyük müxalifət partiyası olan Kuomintanqın (KMT) sədri Çenq Li-Vun jurnalistlərə bildirib ki, təsdiqlənən vəsait yalnız ABŞ silahlarının alınması üçün nəzərdə tutulub.
Ötən ay Çinə səfər edərək Prezident Si Cinpinlə görüşən Çenq əlavə edib:
“Tayvanın milli təhlükəsizliyi iki ayaq üzərində möhkəm dayanmalıdır. Biri kifayət qədər güclü müdafiə qabiliyyəti, digəri isə boğazlararası (Tayvan boğazı) sülhə nail olmaq üçün fasiləsiz səy və qətiyyətdir.”
ABŞ-ın Müdafiə Xərclərinə Dəstəyi
Pekin tərəfindən irəli sürülən suverenlik iddialarını rədd edən Tayvan hökumətinə ABŞ-dan güclü dəstək gəlir. Vaşinqton Tayvanı müdafiə xərclərini artırmağa çağırır.
Ötən həftə ABŞ-ın Tayvandakı ali diplomatı parlamentə müraciət edərək “hərtərəfli” müdafiə büdcəsini qəbul etməyə çağırmış, inteqrasiya olunmuş hava və raketdən müdafiə sistemləri ilə dronların kritik əhəmiyyət kəsb etdiyini vurğulamışdı.
Xatıladaq ki, ABŞ Konqresi 2026-cı ilin əvvəlində Tayvan üçün 2.3 milyard dollarlıq hərbi maliyyə paketini təsdiqləyib.
“Politfm”
