Keçmiş NATO Baş katibi Norveçi münaqişələrlə dolu bir dövrə hazırlayacaq
Norveçin yeni Maliyyə naziri Jens Stoltenberq qlobal böhranların kölgəsində vəzifəyə başladı. Keçmiş NATO Baş katibi ölkəni mümkün ticarət müharibəsinə və regional gərginliklərə qarşı qoruma məsuliyyətini öz üzərinə götürür. Bu addımın, seçki sorğularında geridə qalan Əmək Partiyasına üstünlük qazandıra biləcəyi müzakirə olunur.
Stoltenberq vəzifəyə başladı
Keçmiş NATO Baş katibi Jens Stoltenberq çərşənbə axşamı Norveçin yeni Maliyyə naziri kimi vəzifəyə başladı. Kabinetdəki dəyişiklik çərçivəsində bu vəzifəyə gətirilən Stoltenberq, Rusiyadan qaynaqlanan hərbi təhlükələr və ABŞ-dan gələn ticarət müharibəsi riskinin artdığı bir dövrdə ölkənin maliyyə siyasətini idarə edəcək.
Geniş bir kütlə tərəfindən hörmətlə qarşılanan və populyar bir siyasi fiqur olan Stoltenberqin bu vəzifəyə təyin olunması, sentyabr ayında keçiriləcək parlament seçkiləri ərəfəsində Əmək Partiyası hökumətinə dəstək qazandıra bilər.
“Vəziyyətdən tam xəbərdarıq”
Təcrübəli siyasətçi olan Stoltenberq 2000–2001 və 2005–2013-cü illərdə Norveçin baş naziri vəzifəsində çalışıb, daha sonra isə on il ərzində NATO-ya rəhbərlik edib.
NATO-da olduğu müddətdə, xüsusilə Donald Trampın ilk prezidentlik dövründə alyansı bir arada saxlamaq üçün göstərdiyi səylərlə diqqət çəkib.
Baş nazir Jonas Gahr Støre Stoltenberqin hökumətə qoşulmasının çətin bir dövrə təsadüf etdiyini vurğulayıb. O bildirib ki, “Bu komanda Norveçi çətin dövrlərdə idarə etməyə tam hazırdır.”
Yeni kabinet üzvləri ilə birlikdə Norveç Kralı Haraldı ziyarət etdikdən sonra jurnalistlərə açıqlama verən Støre, “İnsanların gündəlik həyatına real təsir edəcək siyasətlər hazırlayacağıq. Norveç kimi kiçik bir ölkənin qlobal qeyri-sabitlikdən necə təsirləndiyini anlayırıq” – sözləri ilə seçicilərə müraciət edib.
Ticarət müharibəsinin kölgəsində
Norveç Avropa İttifaqının üzvü olmasa da, iqtisadiyyatı əsasən ixraca əsaslanır. Trampın Aİ məhsullarına gömrük rüsumları tətbiq etməklə bağlı hədələrinin ticarət müharibəsinə çevrilməsi halında Norveç iqtisadiyyatı ciddi zərər görə bilər.
Ölkənin əsas ixrac məhsulları neft, təbii qaz və balıqdır. 1996–1997-ci illərdə maliyyə naziri vəzifəsində çalışmış iqtisadçı Stoltenberq, ölkənin iqtisadi sabitliyini qorumaq üçün mühüm rol oynayacaq.
POLİTFM.COM
