Foto: BBC
Britaniyanın Baş naziri Kir Starmer hökumətində ciddi fikir ayrılığı yaranıb: o, vəzifəsində qalmalıdırmı?
Aydındır ki, belə parçalanma uzun müddət davam edə bilməz – ya narazı nazirlər istefa verməli və ya vəzifədən uzaqlaşdırılmalı, ya da baş nazir özü getməlidir.
Dünən axşam nazirlərin Starmerlə görüşü olub. Bəziləri mübarizəni davam etdirməsini, bəziləri istefa üçün vaxt açıqlamağı təklif ediblər, digərləri isə mövcud böhrandan necə çıxmağın yollarını müzakirə ediblər.
Vəziyyətin nəzarətdən çıxdığı artıq aydın hiss olunur. Leyborist Partiyasının deputatları sosial şəbəkələrdə və müzakirələr zamanı Starmerə etimadlarını itirdiklərini bəyan edirlər.
Baş nazirin dünənki çıxışından sonra həm açıq, həm də qapalı tənqidlər güclənib. BBC-nin siyasi redaktoru Kris Masonun məlumatına görə, leyborist deputatlardan biri bu çıxışı “dəhşətli dərəcədə zəif” adlandırıb.
Bir çox deputat hesab edir ki, Starmer artıq böyük seçici kütləsi üçün itələyici fiqura çevrilib və bu, Leyborist Partiyasının “Reform UK” partiyasıyla mübarizəsini çətinləşdirir.
Baş nazir özü isə vəzifədə qalmaqda israrlıdır. Onunla danışan mənbələrə görə, Starmer liderlik uğrunda mübarizələrin həm partiya, həm də ölkə üçün böyük risk yaratdığını düşünür.
Bu gün Starmer üçün çətin gün olacaq – Nazirlər Kabinetinin iclası keçiriləcək.
BBC-nin siyasi redaktoru Kris Mason yazır ki, son dörd il ərzində dörd baş nazir (Boris Conson, Liz Trass, Rişi Sunak və Kir Starmer) barədə reportaj hazırlayıb, halbuki 2007-ci ilə qədərki həyatı boyunca cəmi dörd baş nazirin (Marqaret Tetçer, Con Meycor, Toni Bler və Qordon Braun) dəyişikliyinə şahidlik edib. Bu, Britaniya siyasətində siyasi qeyri-sabitliyin və qısamüddətli baş nazirliklərin artıq yeni norma halına gəldiyini göstərir.
“Politfm”
