ExxonMobil Holdings Azərbaycandakı şist yataqlarından neft və təbii qaz hasil etmək barədə razılığa gəlib. Bununla da Texasda yerləşən enerji nəhəngi hidravlik layların çatladılması sahəsindəki təcrübəsini xarici ölkələrə daşıyır.
“Bloomberg” yazır ki, ExxonMobil, Azərbaycanın dövlət neft şirkəti SOCAR ilə birgə müəssisə yaradıb. Şirkətlərin yaydığı açıqlamaya əsasən, bu əməkdaşlıq onlara Orta Kür hövzəsində “qeyri-ənənəvi karbohidrogen ehtiyatlarını” araşdırmağa və işlənməsinə imkan verəcək. Azərbaycanın qanunverici orqanının təsdiqindən sonra ExxonMobil layihənin operatoru olacaq.
ABŞ-da şist nefti son 15 il ərzində qlobal neft təchizatının əsas yeni mənbəyi olub. Bu proses ABŞ-ı dünyanın ən böyük xam neft istehsalçısına və mayeləşdirilmiş təbii qazın əsas ixracatçısına çevirib. ExxonMobil və digər şirkətlər Permian hövzəsi və ABŞ-dakı digər şist yataqlarında əldə etdikləri təcrübəni geoloji baxımdan oxşar potensiala malik ölkələrə tətbiq etməyə maraq göstərirlər.
Belə qazma işlərini və neft hasilatını tənzimləyən hüquqi və normativ çərçivələr ABŞ-dakından daha mürəkkəb ola bilər. Bu isə əməliyyatların başlanmasından əvvəl genişmiqyaslı danışıqların aparılmasını tələb edir. ExxonMobil və SOCAR layihənin kommersiya və digər aspektləri üzrə bir ildən artıqdır danışıqlar aparırlar. Razılaşma Tramp administrasiyası tərəfindən də təşviq edilib.
ExxonMobil-in baş vitse-prezidenti Bart Cahir bildirib:
“Biz hövzənin potensialını daha yaxşı anlamaq və onun təhlükəsiz və səmərəli şəkildə işlənməsi imkanlarını araşdırmaq üçün SOCAR-ın Azərbaycan haqqında biliklərini ExxonMobil-in qlobal təcrübəsi və texnologiyaları ilə birləşdirəcəyik.”
Politfm
