Nika Qvaramiya: “Biz seçkilərin nəticələrini tanımırıq”
“Biz bu seçkilərin nəticələrini tanımırıq, bu oğurlanmış seçkilərdir, hakimiyyətin zorla ələ keçirilməsidir və konstitusiya çevrilişidir“.
Bunu “Dəyişikliklər üçün Koalisiya”nın liderlərindən biri Nika Qvaramiya fövqəladə brifinqdə deyib.
Müxalif lider iddia edib ki, “Gürcü Arzusu”nun seçki nəticələrini saxtalaşdırdığı sxem aşkar edilib.
“Gürcüstanda hakimiyyətin zorla ələ keçirilməsi baş verib, bu, dövlət çevrilişidir. ‘Gürcü Arzusu’ konstitusiya çevrilişinin müəllifidir və bu hərəkətinə görə ‘Gürcü Arzusu’ mütləq cavab verəcək – Gürcüstan qanunvericiliyinə uyğun şəkildə. Ancaq bundan əvvəl ‘Gürcü Arzusu’ müxalifətin qələbəsini tanımağa məcbur olacaq. Bizdə seçkilərin necə oğurlandığına dair aşkar edilmiş sxem var. Bunun üzərində işləmək üçün müəyyən qədər vaxta ehtiyacımız var idi və bu barədə danışmaq lazımdır. Bu asan məsələ deyil. Biz səslərin müdafiəsinə söz vermişdik və üzr istəyirik ki, bu çətin texnoloji sxemin çözülməsində əvvəlcə uğurlu ola bilmədik və yalnız seçkilər saxtalaşdırılandan sonra bu problemi aşkarladıq. Ancaq mütləq bu barədə danışmalıyıq.
Bir daha xatırladıram ki, bizim əsas qərarımız tamamilə alternativsizdir və biz ondan yayınmayacağıq, yenidən nəzərdən keçirməyəcəyik. ‘Gürcü Arzusu’ bu ölkənin hakimiyyətində qala bilməz. Bu, oğurlanmış seçkilərdir, hakimiyyətin zorla ələ keçirilməsidir və Gürcüstanda konstitusiya çevrilişidir. Bu, baş verməyəcək, bura Rusiya deyil, bura Venesuela deyil, bura Gürcüstandır. Hər kəsə, o cümlədən yenidən Bidzina İvanişviliyə xatırlatmaq istəyirəm ki, onun tarixə heç olmasa bir qədər müsbət rakursla daxil olmaq üçün son şansı var idi, bəlkə də bu şansı artıq olub, hakimiyyətin sülh yolu ilə təhvil verilməsini qəbul etməli idi. O bunu etmədiyi üçün biz öz qərarlarımızı qəbul etmişik, öz yolumuzu seçmişik və artıq gürcü xalqı ilə danışırıq. Biz daha hakimiyyətlə danışmırıq, heç kimlə danışmırıq. Biz seçicilərimizə və gürcü xalqına müraciət edirik, bir daha təkrar edirəm: biz bu seçkilərin nəticələrini tanımırıq, bu, oğurlanmış seçkilərdir, hakimiyyətin zorla ələ keçirilməsidir və konstitusiya çevrilişidir”.
