Seçkiyə iki gün qalmış baş verən hadisə hökumətin təmkinin pozulması kimi şərh olunur
Reuters nəşri Gürcüstanda keçirilən xüsusi əməliyyatla bağlı məqalə dərc edib və yazır ki, hakimiyyət Amerika şirkəti Concentrix-in yerli ofisində, həmçinin Atlantic Council-in iki əməkdaşının evlərində axtarış aparıb.
Nəşr qeyd edir ki, axtarış parlament seçkilərinə 2 gün qalmış həyata keçirilib. Reuters 26 oktyabr seçkilərini test adlandırır, bu test ölkənin yenidən Moskvanın orbitinə qayıdacağını və ya ənənəvi Qərbyönümlü oriyentasiyasını qoruyub saxlayacağını müəyyən edəcək.
Nəşr yazır ki, dörd müxalifət partiyası “Gürcü Arzusu” partiyasından konstitusiya çoxluğunu almaq üçün mübarizə aparır, hakim partiyanın qurucusu, oliqarx Bidzina İvanişvili isə eyni vaxtda vəd edir ki, seçkilərdə qalib gələrsə, müxalifət partiyalarını qadağan edəcək.
Reuters vurğulayır ki, rəsmi Tbilisi ilə Qərb arasında münasibətlər may ayında, “Gürcü Arzusu” partiyası “rus qanunu” qəbul edəndə pisləşdi və bu səbəbdən hakim partiya tənqid hədəfinə çevrildi.
24 oktyabrda Tbilisidə Maliyyə Polisi bir neçə yerdə əməliyyat keçirib. Vake Plaza-da yerləşən Amerika şirkəti Concentrix Georgia-ya Maliyyə Nazirliyinin İstintaq Xidmətinin əməkdaşları daxil olublar və 3-cü mərtəbədə axtarış aparılıb.
Bundan əlavə, Maliyyə Polisinin İstintaq Departamenti Standupper Onise Çxadze və onun qardaşının evinə daxil olub və orada da axtarış aparıb.
Axtarış həmçinin Kutaisidə, vətəndaş Valeri Tkeshelaşvilinin evində də həyata keçirilib. Ailənin sözlərinə görə, polis evə məhkəmə qərarı olmadan daxil olub və axtarış aparıb. Valeri Tkeshelaşvili bildirib ki, istintaq onu “zəng mərkəzləri” ilə əlaqədə günahlandırır, o isə bunu inkar edir.
Qeyd etmək lazımdır ki, axtarışlar həmçinin işlə əlaqəsi olmayan Atlantic Council-in əməkdaşlarının evlərində də aparılıb. Söhbət Sofiya Gelava və Eto Buziashvilidən gedir.
Politfm.com
